80個平均年齡為60歲的大男人，為興趣為有型為挑戰為圓夢,，在音符牽引下，加入首屆信義男爵樂團－一個逾半百男士才可以參加的爵士樂團。
看他們演出，你或會看到一個大肚腩吹奏金光梁邊的色士風，或起了繭的手輕按纖幼長笛的鍵，又或是一對被歲月磨蝕得乾涸的手緊握鼓棍忘我敲打。這群半生為擔子勞碌的男人，初次或再次接觸樂器，以熾熱的心打破「退休說是悶」的宿命，合奏一首首久經歲月沉澱的樂曲。
記:記者
R:Roy
P:Peter
去年基督教香港信義會籌備首屆男爵樂團，共80個學習名額迅速爆滿，超過120名50歲以上男士報名，參加色士風、單簧管、長笛、小號和敲擊樂及爵士鼓班，八成學員為樂器新手。當中包括Roy，還有轉學新樂器的Peter。
色士風唔啱嘴形 日練夜練
R:看到報紙廣告，心思思想報名，但自己對音樂一竅不通，考慮了兩個星期才報名。第一堂說知驚，Drum Set邊打邊樣都認不到，手腳嚴重不協調，完全跟不上拍子。
P:我就好一點，中學時學過五年小號，一直想再學樂器，所以選了跟小號相似的色士風。
記:但那是卅多年前的事，幾十歲人才學新樂器，不怕被取笑嗎？
P:小號只有三個鍵，色士風一排成十幾個鍵，要用哂十隻手指。現在記性又差咗，兩分鐘樂譜足足要練兩個月！，而且初時嘴形唔啱，吹極都唔響。但一直想學新樂器，就當係一種挑戰，又不用考試無壓力，加上日練夜練，三個月後開始適應。
由「骨頭打鼓」到鼓王上身
R:萬事起頭難，我先學左手打鼓，之後用右手，再加埋隻腳，咪又係打到！初時被朋友笑我「骨頭打鼓」，確有點失落，但一心想學新嘢，又無話一定要學識，學得成咪威啲囉。現在愈瑁愈有興趣，一坐低成個鼓王咁，愈打愈起勁，幾有FEEL！
記:本來你想學色士風？
係男人都嚮往學色士風，有型吖嘛！面試時音樂總監叫我露齒、含住紙張，又檢查雙手，知道我右手受過傷，手指唔夠靈活，最後阿Sir叫我學打鼓。
傳統活動悶 喜挑戰難度
男士辛苦大半生，子女長成人，他們退休後，一時間要放下多年來的家庭重擔，難免不適應。退休男士學爵士學。迎來新挑戰，正好填補這份直白。
信義男爵樂團計劃總監Alan(鄧光宇)表示，男士普遍喜歡具挑戰的活動，尤其新一代男長者，不喜歡下棋書法等傳統康樂活動，他們認為較沉悶，而且活動最好有一定難度，需要努力才可達到目標，讓他們有成功感。
提起傳統社區活動，Ray與 Peter 不約而同地認為「唔啱玩」：
R:行山打波是我的興趣，年紀大了，體力未免難應付，故想找一些靜態的活動。不過社區活動大多做手作仔，煮飯，唔適合我。
P:(不住點頭)那些活動較適合女士，如唱粵曲，身邊沒多少個朋友鍾意聽粵曲，好多都係聽流行歌。我亦參加過攝影班，不詔興趣唔大。
R:攝影好個人，好孤獨，音樂就唔同，講合作性，一個人吹色士風無癮架，一班人吹就唔同，趣味濃好多。樂團班兄弟差不多年紀，部分仲返緊工，雖然大家學習步速不同，亦會互相包容體諒，感情好好。
P:我因腰傷提早退休至今已經六七年，身邊朋友未必在同一時間退休，一時之間生活圈子小了很多，現在有共同興趣的同學，很容易建立新圈子。
R:係呀，大家年紀差不多，樂器程度又差不多怕咩瘀呀？同學之間互相鼓勵教導，感覺似舊時小學同學咁簡單。
P:朋友之間亦未必能夠分享共同興趣，現在成班兄弟單純為樂器而走在一起，難得的好純真。
同性同聲同氣 易投入
記:如果不是兄弟班，效果會否不一樣？
兄弟面面相覷，似有難言之隱，再三追問他們才回答。
P:純男人確係較容易有化學作用，大家都係男人，容影溝通，而且大家接受範圍闊一點。
R:或者咁講，男性有共同language，女性有曷收埋收埋，男士就冇咩所謂。
同年同性同聲氣，令長者更易投入學習。信義會服務總監（長者服務）劉翀指研究結果表示，金齡男士（詳見另稿）選擇服務甚注重「空間感」：例如學樂器，到琴行與年青人一起學，或跟年紀相若的初哥兄弟上堂學，當然以後者的學習環境較友善，長者於同輩間易生安全感，而且不怕瘀，可輕鬆學習。
長者調查
信義會長者綜合服務早前進行「金齡男士」服務需要研究，所謂金齡，即生於戰後嬰兒潮的50至65歲長者，按人口普查數據，50至64人口已由2001年93萬人大幅增加至2011年的150多萬人，現時幾乎每5個人便有1個為金齡長者。
受訪的102名金齡男士，近三成學歷達到大專或大學程序以上，比同齡女士高。而他們的零用錢亦多，約有兩成多的金齡男士每月可動用生活費高達1萬元或以上，亦比同齡女士高。這群長者普遍教育水平、社會地位較老一輩長者高，講究生活質素和品味。
沒有留言:
張貼留言